بنيت فى يوم اساس
فى قلوب ماتساويش
ولما مسكت الفاس
الارض ماطرحتليش
دويت جروح الناس
ورضيت بجرحى اعيش
اشرب واملى الكاس
من دمع غيرو ماليش
ياليييييييييييييييييييييل
فين الصحاب فين الخلان
فين اللى عشانهم ضحيت
يرضيك كده يعنى يازمان
ماحد يدق ببان البيت
احلف واقول يادنيا خلاص
لا حب فيكى ولا اخلاص
انا اللى كنت من نوع خاص
وعايش عيشت الدراويش
فى عزى الكل معايه هاص
دلوقت بقيت زى الهيش
******************
دويت جروح الناس
ورضيت بجرحى اغيش
اشرب واملى الكاس
من دمع غيرو ماليش
******************
فى احزانهم انا مدعى
وفى افراحهم ماليش وجود
والله بخاف عليهم ادعى
مع انى صبرى عاده الحدود
انا كنت قادر اعيش سلطان
وابعد عن قلبى الاحزان
لكن عشان جوايه انسان
ضميرى والله ماسمحليش
وقال لى لازم تروى العطشان
من امتى قولت لحد مافيش
*****************
دويت جروح الناس
ورضيت بجرحى اعيش
اشرب واملى الكاس
من دمع غيرو ماليش
****************
طب حد يسال عليا
ويشوفنى عامل ايه
لسه الدمع فى عينيا
ولا انا نسيت لياليه
ياحبايب حرام عليكم
ياصحابى فين اراضيكم
انا كنت عايش ليكم
ارجوكم ماتنسونيش
طول عمرى بفخر بيكم
عشان الملح والعيش
***************
دويت جروح لناس
ورضيت بجرحى اعيش
اشرب واملى الكاس
من دمع غيرو ماليش
.........
بقلم
عماد عطا عطية
ليست هناك تعليقات:
إرسال تعليق