🌹الطير الحر🌹
الجزء الثاني
ا✍️✍️✍️✍️✍️✍️
طافي ضو الكياس، سماء كحلة، القمرة ما فماش، كثير الغيم تبان ما خلاهاش،
وحدي ماشي في ثنية راكبني هلواس، حية فيا وجيعة الإحساس، نسأل في روحي وقتاش وقتاش تفهم هالناس،إنو الصدق ما يتقدر بألماس، إنو الذهب عمرو ما يولي نحاس،إنو الظلم ما يدوم مهما بنادم عاش،إنو نحبك ماهي كلمة تتقال و خلاص،إنو الثيقة بالفلوس ما تتشراش،
إنو القلب ما يفيض من بلاش..!!
طريق خترتو مشيت فيه، متعذب متمرد و باقي مكبش فيه، إحساس فيا من داخل يصيح، كمل كمل راك صحيح،برشة شوك و ساقيك حفيانة، و برشة برد و أكتافك عريانة،برشة خوف و ظهرك مكشوف، يدك عرقانة مسخنتها غزارة الحروف، برشة حيرة وصدمات بالألوف، و ذنبك..!! صدقك و كل شيء مكشوف...
يكتب ، يصنع، ينشر و ما يمل، و المخبي عندو أكثر في الرفوف، هالطير الحر، لا حب يتعب و لا كل، لا وقف بحث عن حل، هالطير العاشق كيف حصل، و بردت جناحاتو و غاب عليه الامل، و من صدمات الحياة تعب، نشهدلو قدام الكل، نشهد قلبو ما صابو الشلل، و بقا صدق الإحساس فيه يشعل، و إبداعو ستارو ما تسدل.
يا ريت، يا ريت نكون مثلك، يا طير تعشق رحيل،يا شامخ مثل الجبل، ما تهزك ريح الليل، في الصباح تردك حجر مكسر.
منك نتعلم، و نريد حياتنا نرمم، والله تعبنا والله، العقل تشل، وقتاه وقتاه تاقف الكفوف..وقتاه نفرح، و ماتاقف ضدنا الايام و الظروف...
هذا عاشق تشوف فيه، عاشق الدنيا هايمة بيه، حتى اسمو يتحاسب عليه،و ماداري حد بالمعنى الي فيه،
الي يتمقعر عليه، و الي يزيدو الف ولام كيف يسميه، و يبدل المعنى الي عمرو ما فكر فيه،
و الي يقول شبيه، و الي يكتب عليه، و الي يتمناه يخفيه، و الي يتمنى السر يحكي عليه،
غريبة الدنيا، كيفاه تجيب عاشق لزمان خاطيه، تسرقلو الفرحة الاحزان تهديه، و بقوة عزمو الحزن يخليه، فن و ابداع العيون و القلوب تعجب بيه، و المخبي في الكوليس شيء كان يتحكى ، تشيح الدموع من العينين ، البحر ينشح، و الصغار تشيب...
هكة نحنا نجي للدنيا نبكي، و نخرج منها مبكي علينا،و مابين البكية و البكية، تموت كل يوم حاجات فينا،
حتى صرنا قبور ناطقة، هكة ولينا، شبينا..!! شبينا..!!
موش من حقنا نعيش، كيف ما نحب
في مخاخهم ما يجيش، كل واحد على كيفو يحبك تعيش..!!
برشة تمهميش، و كيد و ظلم و كذب
برشة اغلاط فينا تعيش، و كيف نحاول نصلح و نتوب... نتعب
نلقى صد كيفو مافيش، و نزيد نغلط و نغلط..
و تسمع عيب عليك ما يجيش، و الي لزك للغلط يخليك و يهرب
حتى جناحاتك ساعات ما تعذرش، و إنت عاذرها و تقول..: " مسكينة حتى هي تتعب..نعرفها ما تخلينيش، ترفرف دايرة بيا مهما كثر عليها الضرب،طايرة بيا للفرحة تحبني نعيش، و انا رافض و انا اليأس بيا فايض"..
تخرجها من الاسباب، و تحط في روحك كل العذاب، و ذنبك...!! حنية قلبك المليان حب...
إيـــه....الطير الحر والله تعب، محتاج راحة كثر عليه الضرب..!! و العرض ماسط، و المخ ساخط، و القلب يشابط، و عركة كبيرة قدام عيني و هاني ساكت...
جيت نكتب عليهم الاثنين، و المهمة وفات..!!
"المهمة وفات" ،تقالتلي قبل..حسيتها و ما صدقتهاش،حتى حصل إلي حصل..
احساسي طول عمرو البطل، كيف يفهمها مخي ما يقبلهاش، يعمل كل شيء باش القلب يفشل...
و هالمرة احساسي يقول الرحلة ما وفات، و عقلي يناقش ما قبلهاش، يظهرلي العركة باش إطول...
خليها العركة بيناتهم، و بيني و بين روحي، موش لازم نقول الاسباب علاش،
كان رجعت، راهو هالقلب باقي حي مهما المر عاش،
و كان مشيت، راني الله غالب من لول هالمهمة ماقبلتهاش...
قالو ناس قبل، الطير الحر ما يتشدش، و إذا تشد ما يتخبطش...
.................................يتبع
ا✍️✍️✍️✍️✍️✍️✍️✍️✍️✍️✍️✍️
عاشق رحيل_عربي همامي
ليست هناك تعليقات:
إرسال تعليق