يا كره داخلنا أذية
شتت ليالينا
وتقطع الحب شظية
والشهوات صارت فينا ألف
بلية...
بنت صبية كانت زهرة
فرحانة
العطر منها زكية
جاها الذيب
وغدرها
أحلامها سرقها وبعثرها
في صورة غير آدمية
رحمة كانت بهية
صبية تحلم والورد يعطرها
تكون في يوم عروسة مجلية
الحلمة هربت في صدرها
وجاء الذيب وكدرها
وشتت بصرها ونحرها
وين الإنسانية ؟
راح خبرها آش يصبر أمها وزهرها
صبية من الهمجية ضاعت
والذيب نحرها
القلب تقطع وتكدر
وقتاش نشوفو القضية
والردع بالقصاص أجمل هدية
يهدي ناري
ويطفي جمر أم الصبية
تونس موجوعة بجمرها
كيف نحررها
من الجريمة وأولادها اللي ضاعوا
بحكم التهميش والهلوسة والدمغشة
والعنف والحرقة
واللي يبيع الزطلة واللي ضيع أولادو
عن غفلة ...
واللي بعد وما فكر
واللي حسد وما دبر
واللي قتل في غمرة شهوة
واللي بكى الزهرة
واللي قطع قلب أم وما رق وما ندم
واللي كسر غصن من شجرة
واللي عفس وما وطى
واللي زرع جرح في القلب
وما هدى
واللي علا و ما فكر في الموت
وتجبر
واللي سرق ودبر
واللي عمل ألف ثنية
من الخطيئة خسر حياتو
حميدة بن ساسي
ليست هناك تعليقات:
إرسال تعليق