ناس بكري قالوا
لا يغرّك زين الوجه
عابر في الثنايا
والعين تضحك مفتونة
صورتها المرايا....
لا يغرك خضرة أرض
ولا ورد الخدود
ولا تذبيلة عين
ولا الياسمين والخمايل
المطر حابس
كالقلوب
معلقة في النّوايا...
لا يغر ّك صحوة السّماء
الشّمس تِضوي
والقمرة في اللّيالي
حالمة مثل المرايا
تتغيّر النّسايم
ويتبدّل الرّبيع
الشّتاء عواصفو جايا...
لا يعجبك
نوّار دفلة في الواد ظلايل...
ولا يعجبك زين طفلة
حتّى تشوف الفعايل
الحواجب سوالفها
في اللّيل خفايا
المحبوب ساكن
ووجيعتو فتايل
وحبايل الحبّ واهيا...
لا يعجبك
زين طفلة إلاّ ماترى
الفعايل...
لا يغرّك الزّمان
قطافو حالمة
من برّة ورد ومشموم
ومن داخل شوكو
م الصّبّار ...آه يا ستّار ...قاسيا...
ولا يغرّك البحر
بِحُسنو في الغريق
حبالو كي المنايا
نايما...
ناس بكري قالوا
حكم...
بعضها كالشّجر
ثمارها حلوة باهيا
والأخرى لوزها مرّ
وما يعجبشي حالها...
حموضة وما شافتّو العين
والأيام باكيا...
والسّفن بين الموج
شراعاتها
ساريا
والرّيح تهزّ عروش القلب
وهدير الموج
من لحظة لحظة عاتيا...
لايغرّك الكلام المعسول
والوجوه الباسمة...
ألف ألف وجه...
والحقايد في النفوس
خافيا...
حميدة بن ساسي
